Conferencia "Busca linces y encontrarás meloncillos"_Encontros Naturalistas decembro 2015



Tal e como vimos de anunciar nos días anteriores, despediremos as actividades do 2015 cunha última e estupenda xornada dos nosos Encontros Naturalistas, da man dun vello amigo e experto biólogo, quen ano tras ano por estas datas adoita compartir connosco o seu coñecemento sobre o patrimonio natural.

A actividade consistirá nunha conferencia que leva como título "Busca linces y encontrarás meloncillos", impartida polo Dr. Carlos Nores Quesada, profesor da Universidade de Oviedo, Vicepresidente da Fundación Oso Pardo e experto na bioloxía, distribución e conservación dos mamíferos, quen ven de publicar ao respecto un artigo na revista científica Chioglossa do Grupo Naturalista Hábitat, e para o cal o autor apoiouse nos dous exemplares naturalizados de furatoxos (Herpestes ichneumon) -nome galego do “meloncillo”- que compoñen a colección depositada na Domus e doada ao Concello da Coruña polos herdeiros de Víctor López Seoane, reputado naturalista e profesor coruñés do século XIX, e que serán mostrados na xornada para a súa posta en valor.

Ao longo da charla falarase da historia desta especie de carnívoro presente na Península Ibérica, e porase en valor o descubrimento da súa descrición por Pérez de Castro no Instituto Cornide de Estudos Coruñeses, combinando historia natural, material científico e experiencias, nunha iniciativa que pretende achegar o coñecemento da natureza á cidadanía.

A actividade, organizada por Hábitat, conta coa inestimable colaboración dos Museos Científicos Coruñeses, e terá lugar na Domus (R/Ángel Rebollo 91. A Coruña) o vindeiro martes 29 de decembro ás 20h. A asistencia é de balde e aberta ao público, ata completar o espazo, polo que dende Hábitat pregamos confirmedes a vosa presenza chamando ao 981 135 014 ou enviando un correo electrónico co asunto "Meloncillo" e os vosos datos a gnhabitat@yahoo.es.

Na seguinte ligazón poderedes descargar o cartaz da conferencia.

Dende Hábitat agradecemos a difusión desta actividade.

Agardámosvos!!

Colabora:


Segue lendo...

Mapa da diversidade biolóxica do Concello da Coruña



Dende o G.N.Hábitat comprácenos comunicarvos que a nosa entidade ven de ser escollida para a elaboración do Mapa da Diversidade Biolóxica do Concello da Coruña. Un proxecto co que se pretende ter unha "imaxe" detallada da biodiversidade presente no noso concello.

Os traballos, que serán desenvolvidos ao longo do 2016, contarán coa participación dun amplo número de colaboradores que compoñen o equipo técnico, responsable desta iniciativa. Para a consecución dos obxectivos previstos dividirase a cidade da Coruña na totalidade das cuadrículas UTM 1x1 km que abranguen a súa extensión, e nas que se farán os muestreos correspondentes obténdose datos xeorreferenciados das diferentes especies. Así mesmo, farase unha labor de recollida de datos históricos, o que fornecerá os resultados do propio proxecto.

Como xa sabedes, Hábitat leva moitos anos traballando polo estudo, conservación e divulgación do patrimonio natural da cidade da Coruña, poñendo en marcha multitude de iniciativas de carácter social en prol do coñecemento da biodiversidade presente no noso contorno, polo que en gran medida este "mapa" xa o levamos facendo dende fai moitos anos. É o que nos gusta, é polo que traballamos duro, e é a finalidade da nosa entidade.

Grazas a todos os que vides de sumarvos nesta iniciativa. Entre todos faremos que a Coruña teña unha boa ferramenta de coñecemento da súa flora e fauna.
Segue lendo...

Asemblea Xeral de socios do G.N. Hábitat_decembro 2015

A Xunta Directiva do G.N.Hábitat comprácese en comunicar a celebración da Asemblea Xeral de socios da entidade, que terá lugar o vindeiro venres 18 de decembro de 2015 no noso local social.

- Asemblea xeral extraordinaria: ás 19:30 h en primeira convocatoria e ás 20:00 h en segunda.
- Asemblea xeral ordinaria: ás 20:30 h en primeira convocatoria e ás 21:00 h en segunda.

Á xornada están convidados a participar todos os SOCIOS da entidade.

Ao rematar a asemblea, convidaremos a un pinchiño navideño para despedir o ano.

Agardámosvos!

Segue lendo...

Relatorio "Busca linces y encontrarás meloncillos"_29 de decembro ás 20h



Qué mellor xeito de pechar o 2015 que gozar dun novo relatorio da man de Carlos Nores, quen nesta ocasión nos virá a falar do coñecido como "furatoxos" (Herpestes ichneumon), e sobre o que ven de publicar un interesante artículo na revista científica Chioglossa do G.N.Hábitat.

O relatorio, que leva como título "Busca linces y encontrarás meloncillos", conta coa colaboración dos Museos Científicos Coruñeses, e terá lugar na Domus o vindeiro martes 29 de decembro ás 20h. A actividade será de balde a aberta ao público, ata completar o aforo.

Nos vindeiros días ampliaremos a información sobre esta actividade. Estade atentos e reservádenos o día 29!
Segue lendo...

Xornada sobre a Saramaganta (Chioglossa lusitanica) "Especie do ano 2015 na Reserva da Biosfera"



Como xa saberedes, a Saramaganta foi escollida "Especie do ano 2015 na Reserva da Biosfera Mariñas Coruñesas e Terras do Mandeo", co obxectivo de achegar á cidadanía o coñecemento desta especie, así como ampliar a súa información no territorio da Reserva, e en Galicia.

Dentro desta iniciativa de "Especie do ano" (que na pasada convocatoria dedicouse ao Gato Bravo en Galicia) tense realizado diversas actividades, como a edición dun tríptico informativo sobre a especie e a elaboración dunha ficha de recollida de datos, todo a disposición do público na páxina web que vimos de facer para a ocasión: http://saramaganta.weebly.com/

Agora, e xa para rematar coa iniciativa deste ano, convidámoste a participar nunha Xornada sobre a Saramaganta, que terá lugar o vindeiro domingo 13 decembro en horario de 10 a 17:30 horas, na Aula da Natureza de Chelo (Coirós).

A participación é de balde e aberta ao público, mais tendo en conta as dimensións da aula o aforo é limitado, sendo imprescindible a inscrición previa seguindo unha destas vías:

- Enviando un correo electrónico a Hábitat (gnhabitat@yahoo.es) co asunto "Xornada", indicando nome completo, teléfono de contacto e correo electrónico.
- Chamando ao teléfono de Hábitat (981 135 014) e indicando os datos referidos.

Así mesmo, se te animas a compartir vehículo deberás indicalo na túa inscrición, reflectindo se “necesito coche” ou “ofrezo coche”, así como o “lugar de saída”. Facilitarás a participación na xornada!! Pouco antes da data faremos chegar vía mail aos inscritos un documento no que aparezan estes datos, para que vós mesmos podades organizarvos.

Na xornada convidaremos a un pequeno pincho durante a comida, pero se preferides podedes traer a vosa da casa (bocadillo ou similar). Recoméndase tamén levar roupa e calzado axeitado.

Descarga aquí o:

- Cartaz da xornada
- Programa da xornada

AGARDÁMOSVOS!!!
Segue lendo...

Gañadores do III Certame de Debuxo da Natureza "Vida silvestre do encoro de Cecebre": o encoro que nunca dorme



Velaquí tedes aos gañadores do III Certame de Debuxo da Natureza...NORABOA A TODOS!

2ª CATEGORÍA (14 anos ou máis)

Os tres primeiros postos no certame recaeron sobre:



Seguindo o especificado nas bases reguladoras, e tendo en conta a novidade recollida este ano pola cal un mesmo autor soamente pode ser galardoado cun premio nalgunha das súas obras, a selección foi especialmente difícil nesta categoría.
Na seguinte figura móstranse as 9 obras que acompañarán aos tres primeiros premios para ilustrar o calendario 2016. De entre elas, considéranse "gañadores na súa especie" aos autores das ilustracións que representan a Deilephila elpenor, Ephippiger ephippiger, Cerambyx scopoli, Genetta genetta, Pipistrellus pipistrellus, Strix aluco e Arion lusitanicus. Aquelas que representan a Lampyris noctiluca e Rana temporaria non teñen consideración de "gañadores na súa especie", por pertencer a autores xa galardoados nos primeiros postos, pasando estes dous premios a quedar desertos pese a figurar as obras no calendario.



Así mesmo, o xurado decidiu tamén deixar desertos os premios nas seguintes especies: Melolontha melolontha, Pholcus phalangioides, Scolopax rusticola e Lissotriton helveticus.

1ª CATEGORÍA (menores de 14 anos)

Velaquí as 12 obras que ilustrarán o calendario 2016, tendo todos os seus autores a consideración de "gañadores na súa especie"



Así mesmo, e a pesar de ser excluídas polo xurado da súa aparición no calendario, tamén son "gañadores na súa especie" as obras dos seguintes artistas:

- Sergio Pereira Veiga, pola obra titulada "Escarabajo come gusanos" (Melolontha melolontha)
- Raúl Regueiro Seoane, pola obra titulada "Por moscas" (Pholcus phalangioides)
- Fiz Moras López, pola obra titulada "Recorrido diurno" (Lissotriton helveticus)
- Iván Sande Sánchez, pola obra titulada "Rompendo o cascarón" (Scolopax rusticola)

MOITAS GRAZAS A TODOS OS PARTICIPANTES!!

Estade agora atentos ás novidades que vaiamos publicando no noso blog respecto das datas definitivas da exposición pública das obras e do acto de entrega de premios.
Segue lendo...

Participación nas VI Xornadas de Sustentabilidade na UDC



Mañá martes 1 de decembro Hábitat volverá participar un ano máis na Feira de Sustentabilidade da UDC, iniciativa organizada pola Oficina de Medio Ambiente da Universidade da Coruña da man de ADEGA, e na que diferentes entidades reunímosnos para coñecernos e mostrar ao colectivo universitario as nosas actividades, ao tempo que se levan á práctica diferentes iniciativas dirixidas ao fomento do consumo responsable, entre outros obxectivos.

A xornada desenvolverase na Facultade de Ciencias da Comuniciación e Socioloxía, no Campus Universitario de Elviña, en horario de 11 a 18 horas. Membros de Hábitat procuraremos estar alí toda a xornada, na que poñeremos en valor as nosas publicacións, actividades e proxectos, aproveitando para falar con todo aquel que se quiera achegar.

Agardámosvos!!
Segue lendo...

Remate da III promoción de Escola de Naturalistas

Chega á última sesión da Escola de Naturalistas 2015!!, con dúas actividades moi especiais. A parte teórica será unha mesa redonda con reputados naturalistas galegos, que nos falarán das súas experiencias de campo, os seus inicios e outras historias relacionadas co medio natural. Terá lugar o xoves 26 de novembro ás 20:30 h no local de Hábitat, e estarán presentes José Luis Rabuñal, Jose Souza, Ramón F. Ramón "Cholo", Guillermo Martínez, Manolo Carregal e Berto Monteagudo.

No ámbito práctico, o domingo 29 de novembro levaremos a cabo un bioblitz na finca do Centro de Investigacións Agrarias de Mabegondo (CIAM), en Abegondo, no que Hábitat está a desenvolver diferentes iniciativas. E que é un BioBlitz? É un estudo intensivo de campo durante un período curto de tempo, no que se explora bioloxicamente unha determinada área para rexistrar e identificar o maior número de especies posible. Isto faise identificando algunhas das especies no campo, pero sobre todo fotografando todos os seres vivos que detectemos, para identificalos a posteriori.

Como xa saberedes, as actividades programadas dentro da iniciativa "Escola de Naturalistas" desenvolvida polo G.N.Hábitat son de asistencia exclusiva para os inscritos en cada promoción. Así todo, esta última sesión, dado o seu interese e transcendencia, queda aberta para a participación de calquera socio de Hábitat que se queira achegar.

Co gaio de facilitar a organización das xornadas, prégase a todos os socios que queiran participar que envíen un correo electrónico co asunto "Escola" a gnhabitat@yahoo.es, ou chamando ao 981 135 014, especificando a qué actividades vanse a sumar.

Agardámosvos!!


Segue lendo...

Novo éxito de participación no III Certame de Debuxo da Natureza



Un ano máis, xentes de todas as idades (dende os máis pequenos de tan só 3 anos, ata maiores de 60) volvéronnos ensinar as súas enormes capacidades artísticas, demostrándonos novamente cómo o debuxo pode ser unha ferramenta estupenda para achegarse á natureza e contribuír ao seu coñecemento. Así, dende o Grupo Naturalista Hábitat vimos de rematar a xestión de todas as ilustracións achegadas para a participación nesta convocatoria do III Certame de Debuxo da Natureza "Vida Silvestre do Encoro de Cecebre": o encoro que nunca dorme, e o resultado é abraiante: 


170 obras dun total de 107 participantes !!

Do total de participantes, 80 pertenceron á 1ª Categoría, que aglutina aos menores de 14 anos, cunha achega total de 103 obras. Pola contra, foron 27 os participantes inscritos na 2ª Categoría (14 anos ou máis), con 67 ilustracións en total.

Nos vindeiros días publicaremos o resultado dos gañadores, segundo o especificado nas bases reguladoras do certame. Estade atentos!

Dende o G.N.Hábitat queremos mostrarlle o noso máis sincero agradecemento a Emalcsa, pola súa implicación un ano máis na promoción desta iniciativa; ao equipo de Edítalos, responsable da edición e montaxe do vídeo promocional deste Certame, e empresa colaboradora da nosa entidade; e por suposto, a todos e cada un dos participantes desta nova convocatoria....vós sodes os verdadeiros protagonistas!!

Moitas grazas a todos.
Segue lendo...

Lotería de Nadal 2015 xa á venda!


Xa están á venda as participacións para lotería de Nadal 2015 do Grupo Naturalista Hábitat. Seguimos apostando polos mesmos números dende 2013, un deles o ano de fundación do grupo. Para facerte con elas, contacta connosco antes do 12 de decembro!

Ao mercar estas participacións, xogarás 1,25€ a cada número e contribuirás con 0,50 € ao sostemento das actividades que organizamos. Prezo da participación: 3 € (2,5 € de lotería e 0,50 € de doazón).
Segue lendo...

Un tigre de Bengala entre ferranchos no encoro da Fervenza

Os colectivos ADEGA, GEAS (Grupo de Estudo dos Animais Salvaxes) e Hábitat solicitamos recentemente á Dirección Xeral de Conservación da Natureza información sobre a presenza dun exemplar de tigre de Bengala (Panthera tigris tigris) nas instalación da empresa Naturmaz, localizadas ao carón do encoro da Fervenza (Aérodromo da Fervenza), concello de Mazaricos.

Nunha recente visita pola contorna do encoro puidose comprobar que dentro das instalacións de Naturmaz, o tigre paseaba nun recinto exterior arrodeado dun valado improvisado con ferros e malla de obra. Ao noso entender, este recinto con conta coas debidas medidas de seguridade e saúde para garantir o benestar do animal, nin tampouco a integridade dos visitantes e residentes das áreas próximas, ao abeiro do establecido na Lei 1/1993, do 13 de abril, de protección de animais domésticos e salvaxes en catividade (artigo 10.3).

Alén de poner estas circunstancias en coñecemento da Xunta, solicitamos da administración que verificara o cumprimento das condicións das autorizacións e permisos cos que deben contar os responsábeis das instalacións (Naturmaz) para a tenza e exhibición do animal, en particular os certificados CITES e as medidas de seguridade e saúde establecidas para o correcto manexo deste exemplar.

A resposta da Xunta: puro surrealismo

En resposta á nosa solicitude de información, a Consellaría de Medio Ambiente informa neste escrito de que no Rexistro de Establecementos de Animais Domésticos e Salvaxes en Catividade “figura inscrita a colección zoolóxica privada composta por un exemplar de tigre, propiedade do Aeródromo da Fervenza”. Asemade, o establecemento non está autorizado como parque zoolóxico, “polo que os animais da colección non poden ser exhibidos ao público”.

Sobre as condicións de seguridade, Conservación da Natureza engade que “ao non ter sido contemplada nin solicitada a priori dita exposición, durante as inspeccións realizadas non foron avaliadas as medidas de protección do público aplicables aos parques zoolóxicos”.

Dende ADEGA, GEAS e Hábitat sorpréndenos que nestas inspeccións non foran avaliadas as medidas de protección do público nen a salubridade e benestar do animal, simplemente por non tratarse dun parque zoolóxico. Resulta evidente que o obxectivo desta “colección zoolóxica privada”, pertencente a unha empresa que publicita “turismo activo, ocio y deportes de aventura” é exhibilo aos visitantes; visitantes cuxa seguridade pode estar en perigo dadas as condicións de “retención” do tigre, con uns cantos ferranchos e malla de obra.

O uso do tigre como atracción para usuarios e clientes do lugar é evidente e fica ademais demostrado á vista dos comentarios que os grupos de visitantes suben a internet, por exemplo esta web do alunado de primaria do IES Fogar de Carballo.

Por outra banda, a esistencia dun documento CITES (Convenio sobre o Comercio Internacional de Especies Ameazadas de Fauna e Flora Silvestre) e dun certificado veterinario para o exemplar, como tamén informou a Xunta, non implica que o tigre estea nas axeitadas condicións. E sobre esta cuestión, clave para verificar o benestar do animal e o cumprimento da lei, a Xunta non se pronuncia.

Xa é triste que un exemplar de tigre de Bengala sexa retido e exhibido nestas condicións, mais o verdadeiramente lamentábel é que a Xunta recorra a pobres subterfuxios (“non é un zoolóxico”) para renunciar a cumprir as súas funcións e facer a vista gorda diante dunha situación máis que irregular.

ADEGA
GEAS (Grupo de Estudo dos Animais Salvaxes)
Grupo Naturalista Hábitat
Segue lendo...

O domingo 15 de novembro terá lugar o último Roteiro Naturalista pola Torre de Hércules deste ano, e índa quedan algunhas prazas libres tanto na quenda das 10 h como na das 12 h.
Esta iniciativa conxunta do Servizo de Medio Ambiente do Concello da Coruña e o Grupo Naturalista Hábitat ofrece a residentes e turistas visitas guiadas a pé de 2 horas de duración, polos sendeiros do cabo ata Punta Herminia. Durante o traxecto, os guías explicarán as especies que se poden observar, os valores naturais da zona e as ameazas ás que se ve sometida, ademais de atender ás consultas que os participantes desexen formular.

A asistencia é de balde e está aberta a todos os públicos, se ben os menores de idade deberán ir acompañados dun adulto. Para participar só será necesario enviar un email a gnhabitat@yahoo.es co asunto "ROTEIROS", indicando os datos completos do/s participantes (nome e apelidos, DNI e teléfono de contacto de todos os asistentes), así como a data e quenda na que se quere asistir.

Para máis información consulta:

Tríptico sobre roteiros (PDF)

Vídeo promocional (Youtube), realizado por Edítalos


Segue lendo...

Xornadas sobre biodiversidade na RB_MCeTM: A biodiversidade en espazos agrogandeiros




O G.N.Hábitat, da man da Reserva da Biosfera Mariñas Coruñesas e Terras do Mandeo o Instituto Galego da Calidade Alimentaria (INGACAL) e a Consellería de Medio Ambiente, Territorio e Infraestructuras (Xunta de Galicia), comprácese en comunicarvos a organización das:

"Xornadas sobre biodiversidade na Reserva da Biosfera Mariñas Coruñesas e Terras do Mandeo: A biodiversidade en espazos agrogandeiros" 

A xornada, prevista para o vindeiro luns 26 de outubro de 2015 en horario de 9:30 a 17:30 horas, está dirixida a:
- Traballadores, técnicos, profesionais e estudosos nos eidos agropecuario, forestal e ambiental.
- Técnicos e representantes das Administracións Públicas
- Público interesado

A asistencia é de balde, sendo imprescindible a inscrición previa segundo as especificacións mostradas no cartaz.

O obxectivo desta iniciativa é establecer un punto de encontro e debate sobre a relevancia dos sectores da agricultura e gandería na paisaxe galega, con especial fincapé á súa ligazón na conservación da diversidade biolóxica en función do uso, manexo e xestión do territorio. Nesta liña, a Reserva da Biosfera Mariñas Coruñesas e Terras do Mandeo supón un marco de traballo incomparable, dado o seu forte arraigamento agropecuario e o seu obxectivo por compatibilizar a mellora ambiental co desenvolvemento sostible, así como o fomento da educación e participación pública.

Diferentes expertos ofrecerán sendos relatorios, rematando a xornada cunha mesa redonda de debate e posterior visita ao contorno da finca do Centro de Investigacións Agrarias de Mabegondo (CIAM).

Nas seguintes ligazóns poderás descargar os arquivos correspondentes ao:
- Programa da xornada
- Cartaz da xornada
Segue lendo...

Nova colaboración co Centro Xuvenil Abeiro



O vindeiro venres 16 de outubro colaboraremos nas "Tardes de lecer" organizadas polo Centro Xuvenil Abeiro, actividade dirixida aos rapaces integrados nesta fermosa iniciativa de carácter social. Na xornada aproveitaremos a ocasión para poñer en valor os Xardíns de Méndez Núñez como espazo de interese natural na nosa cidade. Confiamos en que sexa do seu agrado!

Non é a primeira vez que traballamos con eles (vimos de facer outras actividades fai tempo), así que parace que a sintonía é boa!
Segue lendo...

Presentación da "Especie do ano 2015 na RB_MCeTM" nos centros escolares



Nestes últimos días varios compañeiros de Hábitat, da man de técnicos da Reserva da Biosfera, vimos de presentar en diversos centros escolares a iniciativa "Especie do ano 2015 na Reserva da Biosfera Mariñas Coruñesas e Terras do Mandeo", e que nesta ocasión está dirixida a procurar un mellor coñecemento da nosa Saramaganta (Chioglossa lusitanica).

Foron un total de 3 os centros que puidemos visitar: colexio A Grande Obra de Atocha (A Coruña), CPI Castro Baxoi (Miño) e o IES de Viós (Abegondo), con máis de 100 mozos participantes...unha moi boa experiencia para todos!!


Segue lendo...

Encontros Naturalistas: Días das aves 2015


A vindeira fin de semana celébrase o "Día mundial das aves", momento no cal diferentes entidades organizan actividades para a posta en valor deste fermoso grupo faunístico.

Como no podería ser doutro xeito, dende o G.N.Hábitat conmemoraremos un ano máis esta data, organizando unha actividade dirixida a informar e axudar a identificar as aves presentes no noso contorno, aprendendo os seus rasgos e características, e aproveitando para promover o aprendizaxe no uso de material óptico e guías de campo, esenciais para o seu goce.

A actividade, que conta co apoio do Concello da Coruña e da Reserva da Biosfera Mariñas Coruñesas e Terras do Mandeo, desenvolverase ao longo da mañá do domingo día 4 de outubro, e será de balde e aberta á participación cidadá. Así todo, e vistas as previsións meteorolóxicas hoxe día para esa data, dende Hábitat establecemos dúas alternativas:

- Se o tempo acompaña:
Desenvolverase unha xornada de observación de aves no campo. O horario da mesma será de 10 a 13 horas, tempo durante o cal tres equipos, compostos por membros de Hábitat, estaremos situados en diferentes puntos para que todo aquel que se queira achegar poda aprender connosco e gozar das aves. Os lugares escollidos son:

Equipo 1: O Portiño (A Coruña). Responsable do equipo: Santiago (teléfono 620285474)
Equipo 2: Punta Herminia (A Coruña). Responsable do equipo: Andrés (teléfono 650357294)
Equipo 3: Encoro de Cecebre (Abegondo). Responsable do equipo: Manuel (teléfono 649213614)

Poderás ver os lugares exactos nos que estaremos situados consultando este mapa.

- Se o tempo non acompaña:
A actividade trasladarase ao local do G.N.Hábitat (rúa Camariñas 8, baixo. 15002, A Coruña. Ver mapa), no que desenvolveremos un obradoiro de divulgación das aves. O horario desta actividade será de 11:30 a 13 horas, e farase sempre e cando a xornada de campo non se poda levar a cabo polas malas condicións meteorolóxicas, cuestión que será decidida polos organizadores da actividade. Neste obradoiro aproveitaremos para expoñer unha presentación sobre as aves, comentando diferentes aspectos sobre a súa importancia, características e identificación, ao tempo que se porá en valor diverso material (plumas, craneos, niños, reproduccións, guías de campo, material óptico, etc).

Priorizarase a realización da xornada de campo fronte ao obradoiro (non se realizarán as dúas actividades, tan só unha delas), polo que todo interesado en acudir á xornada deberá chamar previamente aos teléfonos de contacto reflectidos anteriormente, co gaio de informarlle de cal das actividades se vai a desenvolver finalmente, xa que a decisión de mudar unha pola outra pode tomarse en calquera momento segundo a climatoloxía.

Anímate e ven connosco a gozar das aves!!
Segue lendo...

Colaboración de Hábitat no Festival Mar de Mares



O vindeiro sábado día 3 de outubro, en horario de 11:30 a 13:30 horas, o G.N.Hábitat colaborará nunha das actividades previstas no programa do "Festival Mar de Mares". Este festival pretende ser unha iniciativa que xire ao redor do mundo mariño, sendo ao longo das actividades programadas onde ser porá de manifesto a importancia dos océanos e dos seus ecosistemas como fonte de riqueza natural, e a necesidade da súa conservación. Nesta liña o festival acolle multitude de actividades (exposicións, talleres, charlas, etc) en diferentes espazos, e nas que a cidadanía pode participar activamente.

Pola nosa banda, o G.N.Hábitat sumarase á actividade nomeada "Limpieza de las calas de Punta Herminia", na que participará tamén a Sociedade de Montaña Ártabros. Esta última levará a cabo a limpeza dos coídos no contorno de Punta Herminia, mentres que nós aproveitaremos para poñer en valor a riqueza natural deste fermoso espazo e expoñer a problemática derivada da presenza de plásticos nas nosas augas e o seu impacto na biodiversidade.

A actividade é de balde e aberta á participación cidadá, sendo o punto de saída no centro de visitantes da Torre de Hércules.

Agardámoste o sábado!

Máis información:
- Descarga do programa completo do Festival Mar de Mares
Segue lendo...

Vídeo do III Certame de Debuxo da Natureza



Velaquí tedes o vídeo que vimos de elaborar grazas á colaboración de Edítalos (dedicada á edición e montaxe de vídeos), para a promoción do III Certame de Debuxo da Natureza "Vida silvestre do Encoro de Cecebre": o encoro que nunca dorme.

Confiamos en que sexa do voso agrado.

Axúdanos a difundilo e anímate a participar!

Descarga aquí a:
- Versión para compartir vía teléfono móbil (whatsapp, etc.)
- Versión de alta calidade
Segue lendo...

Resultados do I Encontro de Aneladores en Distriz (Monforte)


Catro especies de papuxas da zona: papuxa das amoras  
Sylvia atricapilla, papuxa común Sylvia communis, papuxa cabecinegra Sylvia melanocephala e papuxa picafollas Sylvia borin. Foto: Damián Romay.
O pasado 6 de setembro celebrouse en Distriz (Monforte de Lemos) o I Encontro de Aneladores "Chris Mead", como conmemoración do 50 aniversario da visita realizada por este anelador da British Trust for Ornithology a esa localidade do 1 a 5 de setembro de 1965.

O evento foi organizado por Hábitat e a Sociedade Galega de Ornitoloxía (SGO), e contou con 25 participantes dos grupos de anelamento Hércules e Píllara, así como aneladores independentes e afecionados á ornitoloxía.

Desplegáronse en total 108 metros de rede en varias ubicacións, que se mantiveron en activo durante 12 horas e recolleron 79 aves de 15 especies diferentes, que se detallan a continuación:


Como parte dos actos da xornada, léronse as palabras de agradecemento remitidas pola familia de Chris Mead, xa falecido:

It is a great honour that the Galician Bird Ringers have chosen to name the meeting after Chris. Bird ringing was so much part of his life and he loved teaching people the techniques and passing on his passion to others. His enthusiasm for it never waned and it is thought that through his life he ringed over 250,000 birds. The data collected through ringing has allowed biologists to learn enormous amounts about bird behaviour and migration and to know that Chris's name will be associated with the ringing group in Spain and new generations of bird ringers is very touching. The family wishes you well and hope that the first Encontro bienal de aneladores "Christopher Mead" is a great success.

Estas primeiras xornadas de anelamento tiveron boa cobertura por parte da prensa:
- En memoria do inglés que vixiou en Distriz o paso das aves migrantes (La Voz de Galicia 29-8-15)
- Medio século de avifauna en Monforte (La Voz de Galicia 4-9-15)
- Monforte convértese nun observatorio de ornitoloxía (La Voz de Galicia 7-9-15)
- Un radical cambio ambiental testemuñado polas aves en Distriz (La Voz de Galicia 8-9-15)

Chris Mead fixo unha segunda visita entre o 21 de agosto e o 23 de setembro de 1967, polo que está previsto repetir este evento dentro de dous anos.
Segue lendo...

Actividade adiada ata novo aviso: "Xornadas de biodiversidade en espazos agrogandeiros na RB_MCeTM"

Prezados compañeiros

Lamentandoo moito e por motivos de xestión da actividade, motivados pola escasa representatividade dos diferentes organismos convidados e da imposibilidade de asistencia na data fixada dalgún dos respresentantes, vimos de decidir adiar a celebración das "Xornadas de biodiversidade en espazos agrogandeiros na Reserva da Biosfera Mariñas Coruñesas e Terras do Mandeo", prevista para o vindeiro luns 28 de setembro.

A data definitiva de realización das mesmas, que estimamos previsible a finais do mes de outubro de 2015, será comunicada polas mesmas canles de difusión que vimos de utilizar.

Lamentamos as molestias e agradecemos o voso interese.

Confiamos en contar convosco proximamente!  Segue lendo...

Xornadas de biodiversidade en espazos agrogandeiros na RB_MCeTM


Dende o G.N.Hábitat, da man da Asociación de Desenvolvemento Rural "Mariñas-Betanzos" e do Instituto Galego da Calidade Alimentaria (INGACAL), comprácenos comunicarvos a organización das "Xornadas de biodiversidade en espazos agrogandeiros na Reserva da Biosfera Mariñas Coruñesas e Terras do Mandeo" prevista para o vindeiro luns día 28 de setembro, en horario de 10 a 14 horas.

A xornada está especialmente dirixida a traballadores, técnicos, profesionais e estudosos nos eidos agropecuario e medioambiental. A asistencia é de balde, sendo imprescindible a inscrición previa segundo as especificacións mostradas no cartaz.

O obxectivo desta xornada é establecer un punto de encontro para a conversa sobre a importancia do uso e xestión dos contornos agrogandeiros e a súa relación coa diversidade biolóxica. Diferentes expertos ofrecerán sendos relatorios (ver "programa"), rematando a xornada cunha mesa redonda de debate na que participarán diferentes personalidades dos sectores implicados.

Nas seguintes ligazóns poderás descargar os arquivos correspondentes ao:
- Cartaz da xornada
- Programa da xornada

Agardamos contar coa túa presenza!!
Segue lendo...

III Certame de Debuxo da Natureza "Vida silvestre do encoro de Cecebre": o encoro que nunca dorme



Un ano máis, o Grupo Naturalista Hábitat, da man da Empresa Municipal Aguas de La Coruña (Emalcsa), comprácese en organizar o III CERTAME DE DEBUXO DA NATUREZA "Vida silvestre do encoro de Cecebre", cunha temática este ano que xira ao redor das especie animais de hábitos nocturnos, o que nos leva a bautizar esta convocatoria co sobrenome de O encoro que nunca dorme.

Coa posta en marcha desta actividade preténdese implicar á xente no contacto co seu contorno, a través do debuxo da flora e fauna silvestre presente nun espazo natural protexido como é o encoro de Cecebre, incluído no Reserva da Biosfera "Mariñas Coruñesas e Terras do Mandeo". Así mesmo, de entre as obras achegadas seleccionaranse aquelas que pasarán a ilustrar o Calendario 2016 da nosa entidade.

A inscrición é de balde e aberta á cidadanía, non sendo preciso ter aptitudes nin coñecementos en ilustración para poder participar, tan só as ganas de gozar da natureza a través do seu debuxo. Haberá dúas categorías diferentes (menores e maiores de 14 anos) e premios en todas elas para as obras máis salientables.

O pasado ano achegáronse máis de 240 obras de multitude de participantes de todas as idades. Anímate a participar, difúndeo e axúdanos a superarnos este ano!

O prazo de peche de inscricións e entrega dos debuxos remata o vindeiro venres 6 de novembro de 2015.

Descarga aquí os arquivos necesarios para a túa participación:
- Bases reguladoras da convocatoria
- Ficha de inscricíón
- Cartaz do certame

Nuns días colgaremos un novo vídeo promocional para a difusión do evento, no volo perdades!
Segue lendo...

A saramaganta, especie do ano 2015 na Reserva da Biosfera MCeTM

Saramaganta (C) Juan Varela
A saramaganta ou píntega rabilonga (Chioglossa lusitanica) é un anfibio da familia Salamandridae, endémico do noroeste da Península Ibérica, que foi escollida como Especie do Ano 2015 na Reserva de Biosfera Mariñas Coruñesas e Terras do Mandeo (MCeTM), grazas á colaboración do Grupo de Desenvolvemento Rural As Mariñas Betanzos, da propia Reserva e do Grupo Naturalista Hábitat.

Para facer un pouco máis accesible esta especie tan descoñecida, temos elaborado este tríptico coa información dispoñible ata o momento, así como a web http://saramaganta.weebly.com, onde recompilar e poner a disposición do público información sobre esta especie.

Tamén iniciamos una campaña de recollida de datos, tanto históricos como actuais, polo que se coñeces algunha cita de saramaganta en Galicia, pregamos que cubras esta ficha e nola fagas chegar por mail ou correo postal.

Por último, estamos a organizar unha xornada divulgativa sobre esta especie, da que informaremos próximamente.

Esta iniciativa non podería levarse a cabo sen a colaboración destas persoas e entidades:

Segue lendo...

IV Semana da Custodia do Territorio

O vindeiro sábado 19 de setembro comeza a cuarta edición da Semana de Custodia do Territorio nas Mariñas Coruñesas e Terras do Mandeo, cunha xornada de mañá sobre especies exóticas invasoras, un problema ecolóxico cada vez máis preocupante. Falarase dos problemas que causan a flora e fauna foráneas, e como afrontar a súa eliminación dende os concellos. Finalmente unha mesa redonda tratará de establecer las bases para elaborar unha estratexia intelixente e eficaz para combatelas na nosa comarca.

O domingo 20 á tarde terá lugar a eco-regata da ría de Betanzos para limpar ese entorno de basura, e o sábado 26 pola mañá retiraranse varias especies de plantas invasoras que ameazan a praia da Alameda, en Ponte do Porco, o areal máis valioso do espazo natural protexido ZEC Betanzos-Mandeo.

Por último, o domingo 27 pola mañá participaremos na limpeza simultánea de ríos de toda Galicia que coordina o Proxecto Ríos.

Podes descarga-lo programa completo AQUÍ e atopar información de cómo inscribirte en www.fragasdomandeo.org. < Anímate a participar. A lo menos unha vez ó ano debemos devolverlle á natureza o favor que nos fai por permitirnos tantos momentos de lecer no monte e na praia.
Segue lendo...

Encontros setembro - El dilema de Spallanzani


Tras un verán de pouco descanso voltamos cos Encontros Naturalistas 2015, e en setembro temos a sorte de contar con Roberto Hermida, Doutor en Bioloxía pola USC, membro da asociación conservacionista Drosera e experto en morcegos.

Fará unha presentación do recén publicado libro "El dilema de Spallanzani", que parte dos experimentos realizados por Spallanzani sobre orientación dos morcegos para contar experiencias vividas no campo e anécdotas derivadas do estudo destes mamíferos voadores.

O libro estará á venda no local do Grupo, xa que somos punto de venda de libros de Tundra Ediciones, que ademáis colabora co financiamento do grupo doando parte das vendas.

Será o xoves 17 de setembro ás 20:30 horas no local do G. N. Hábitat, (rúa Camariñas 8, baixo, A Coruña).

Xa que o aforo é limitado, é imprescindible anotarse enviando un correo electrónico co asunto ASISTENCIA, e os socios terán preferencia.
Segue lendo...

6-setembro: I Encontro Bienal de Aneladores “Christopher Mead”


Hábitat e a Sociedade Galega de Ornitoloxía (SGO), co apoio dos grupos de anelamento Hércules e Píllara, organizan un I Encontro de Aneladores en Distriz (Monforte de Lemos), como conmemoración do 50 aniversario da visita realizada por Chris Mead e o equipo de aneladores da BTO a esa localidade o 1 a 5 de setembro de 1965.

O anelamento será o domingo 6 de setembro en Distriz, en dúas sesións: 7:30 h e 15 h, con xantar campestre (os asistentes terán que levar a súa comida).

Como a actividade comeza temprano, está previsto ir o sábado 5 á tarde para preparar os lugares para as redes, ter unha cea de confraternización en Monforte e durmir alí.

Para participar na actividade, que ten prazas limitadas, terán preferencia os socios de Hábitat e da SGO. Para inscribirse, é preciso enviar un e-mail a gnhabitat@yahoo.es co asunto MONFORTE, indicando nome, asociación/grupo de anelamento á que pertence, teléfono de contacto e asistencia á cea.

Podes descargar o cartaz en PDF, e un documento con información sobre a actividade (incluindo opcións de aloxamento).

Chris Mead e o equipo da BTO fixeron unha segunda visita entre o 21 de agosto a 23 de setembro de 1967, polo que está previsto repetir este evento dentro de dous anos.
Segue lendo...

Solicitude de suspensión da Actuación medioambiental na praia de Sada

A Delegación de As Mariñas da Sociedade Galega de Historia Natural, Grupo Naturalista Hábitat, ADEGA-Coruña, Plataforma na Defensa da Ría de Sada e Betanzos, Asociación Ecologista Arco Iris, Asociación Cultural O Rabo do Galo e Sociedade Galega de Ornitoloxía presentaron hoxe un escrito ante a Demarcación de Costas de Galicia.

Neste escrito se pide a suspensión total do obra “Actuación medioambiental de la ría del Pedrido, fase I, playa de Sada (A Coruña)” e a anulación do proxecto “Actuación medioambiental de la ría del Pedrido (A Coruña)”, debido ás graves deficiencias no Estudo de Impacto Ambiental no que se basea a súa Declaración de Impacto Ambiental. Non parece lóxico nun estado moderno que se acometan proxectos baseados en Estudos de Impacto Ambiental redactados dez anos antes sobre unha ría como a de Sada – Betanzos.

Esta obra non ten en conta a destrución da pradeira da planta acuática zostera na propia praia de Sada, sendo unha zona de refuxio e cría de especies mariñas (algunhas con interese comercial). Tamén, entre outros aspectos, se minimiza o impacto sobre a zona prevista de extracción da area (enfronte de Lorbé). Esta zona serve de lugar de cría e recrutamento de diversas especies de aproveitamento comercial tal e como xa puxeron de manifesto as Confrarías de pescadores da ría de Sada e Betanzos xunto coa da Coruña.


Se debe acometer un novo proxecto ambiental da ría de Ares-Sada-Betanzos (funciona como un único ecosistema) afrontando os problemas de contaminación, impacto das infraestruturas existentes, mellora dos recursos marisqueiros e pesqueiros e mellora dos espazos protexido, pero sen danar os ecosistemas xa existentes e coa menor obra civil posible. Este novo proxecto debe contar cun novo estudo de impacto ambiental e ter o máximo consenso entre os sectores sociais implicados.

Descarga aquí a denuncia completa.
Segue lendo...

Nova ferramenta para o proxecto de anelamento "Gaivotas patiamarelas nas Illas de San Pedro"



Dende o G.N.Hábitat comprácenos comunicarvos que nun breve espazo de tempo teremos habilitada unha nova ferramenta de traballo, a cal permitirá dinamizar a xestión e resposta dos resultados que se veñen acadando no marco do proxecto de anelamento de gaivotas patiamarelas (Larus michahellis) nas Illas de San Pedro, desenvolvido pola nosa asociación. O proxecto, iniciado no pasado ano 2010, engloba un total de 4 campañas de anelamento, postas en práctica polos grupos de anelamento Hércules e Píllara, cun total de 173 individuos marcados hoxe día.

Neste tempo son moitos os colaboradores que nos teñen remitido as súas citas e imaxes das “nosas gaivotas” ao longo da xeografía, sendo esta información a que lle da sentido ao proxecto posto en marcha. Nesta liña, a batería de datos obtida crece día a día, facéndose cada vez máis necesaria a procura dunha ferramenta que permita corresponderlle aos colaboradores a súa implicación.

Así, dende o G.N.Hábitat estamos a traballar nunha plataforma online que permitirá a incorporación das observacións e imaxes por parte do propio autor, dun xeito cómodo e intuitivo, permitindo finalmente xerar e gardar dun modo automático a Historia Vital de cada exemplar observado, así como consultar o historial de todos os individuos marcados. Con isto preténdese facer aos colaboradores partícipes activos na xestión das Historias Vitais, contribuír ao estudo no eido da ornitoloxía e achegar a información científica á cidadanía.

Moitas grazas a todos aqueles que estades a facer posible este proxecto.

Seguimos traballando!
Segue lendo...

8 de agosto ás 13 h - especial sobre fauna invasora

O sábado 8 de agosto ás 13 h emítese no programa Bicherías da Radio Galega un monográfico sobre especies de fauna invasoras, no que participará Hábitat da man de Damián Romay.

Nel falarase das especies invasoras máis comúns en Galicia, os problemas que están a causar, e qué podemos facer para aportar o noso gran de area e minimizar os impactos.

Lembra que se non podes escoitalo en directo tes a opción de escoitar e mesmo descargar o podcast na web da RTVG.
Segue lendo...

Precisamos pilas e tarxetas de memoria!

Hábitat ten un grupo de traballo de Fototrampeo que está a desenvolver actividades e proxectos concretos, sempre baixo criterios científicos e cuns obxectivos definidos nos eidos do estudo, conservación e divulgación do patrimonio natural.

Trala recente adquisición de novas cámaras, atopámonos con que as pilas e tarxetas de memoria que temos non son suficientes para rotalas, o que supón retrasos e inconvintes á hora de revisar e manter as cámaras no campo. Por iso, se tes pilas AA tanto normais como recargables e tarxetas de memoria SD ou microSD de 2 GB que non uses, agradecemos que nolas dones.

Se queres saber máis sobre o fototrampeo, visita esta ligazón.
Segue lendo...

9-8-15: Rastrillo Solidario Fragas do Mandeo

Este domingo 9 de agosto entre as 9:00 e as 14:00 horas terá lugar na praza do Campo de Betanzos un Rastrillo Solidario organizado pola Fundación Fragas do Mandeo.

Con esta actividade, a Fundación, composta por Rabo do Galo, Sociedade Galega de Historia Natural e Grupo Naturalista Hábitat, pretende recadar fondos para o desenvolvemento das súas actividades.

No rastrillo póñense á venda unha gran variedade de obxectos (libros, complementos de vestir, artigos de regalo e do fogar, xoguetes, etc.), todos eles doados polos socios e colaboradores

Invitámosvos a colaborar na montaxe dos postos, levar todos aqueles obxectos que non precisedes (unha boa forma de facer limpeza no faiado!), e a mirar se hai algo que vos interese mercar a bo prezo.
Segue lendo...

Encontros naturalistas xullo 2015: manexo de especies invasoras en illas


Nos Encontros Naturalistas de xullo 2015 temos a sorte de contar con Lucía Latorre Piñeiro, Doutora en Bioloxía pola USC que realizou a súa tese doutoral sobre impactos e manexo de invasións biológicas en illas, no Instituto Mediterráneo de Estudos Avanzados (IMEDEA, C.S.I.C.- U.I.B.). Na actualidade, é coordinadora de manexo de especies invasoras no Vallée de Mai, Seychelles, coa Seychelles Islands Foundation.

Falaranos da súa experiencia personal como bióloga no eido do manexo de especies invasoras, pasando por distintos casos en illas moi diferentes: Seychelles, Sálvora e Cíes. Podes ler un adianto nesta nova de La Región.

Será o xoves 16 de xullo ás 20:30 horas no local do G. N. Hábitat, (rúa Camariñas 8, baixo, A Coruña).

Xa que o aforo é limitado, é imprescindible anotarse enviando un correo electrónico co asunto ASISTENCIA, e os socios terán preferencia.
Segue lendo...

Xornada de anelamento científico de aves cos afiliados da ONCE



E por fin, logo das dúas primeiras xornadas, o pasado día 20 de xuño realizamos a derradeira -e quizais a máis impactante- das actividades contempladas nas "Xornadas de achegamento ás aves dirixidas a discapacitados visuais", nas que veñen de colaborar ONCE Coruña e Emalcsa, e que contaron co apoio do Concello da Coruña e da Reserva da Biosfera "Mariñas Coruñesas e Terras do Mandeo".




A actividade, guiada polos compañeiros do Grupo de Anelamento Píllara, fixo as delicias de nenos, maiores, pais, membros de Hábitat, e de todo canto alí estivo gozando da mañá. Merlos, pardais, ferreiriños e outras especies puideron ser recollidas e marcadas mediante anelamento científico, ferramenta esencial no estudo das aves.



Ao longo da xornada, os asistentes puideron no só aprender a importancia e metodoloxía para a posta en práctica desta técnica, senón que tamén tiveron a posibilidade de visitar as redes utilizadas para a recollida das aves, manipular o material necesario para o anelamento, e memo achegarse ás aves dun xeito único!, chegando a tomar conciencia da súa morfoloxía.



Poñemos así punto e final a unhas fermosas xornadas, que todos queremos que se volvan repetir.

Grazas a todos os que as fixestes posible!

Segue lendo...

Paseo guiado para a identificación das aves cos afiliados da ONCE



Logo do obradoiro realizado o día anterior, o pasado sábado 13 de xuño puxemos en marcha a segunda das actividades previstas nas "Xornadas de achegamento ás aves dirixidas a discapacitados visuais", nas que veñen de colaborar ONCE Coruña e Emalcsa, e que contan co apoio do Concello da Coruña e da Reserva da Biosfera "Mariñas Coruñesas e Terras do Mandeo".



Nesta saída de campo, desenvolvida no contorno do parque de Santa Margarita e guiada polo compañeiro e experto ornitólogo, Cosme Damián Romay Cousido, os asistentes puideron poñer en práctica o aprendido na sesión anterior, solucionando todas as dúbidas que se ían presentando e procurando recoñecer ás aves responsables de todos aqueles sons que nos acompañaban no noso camiñar... Merlos, papuxas, lavandeiras, pombos e moitas outras deixáronse escoitar. O parque estaba cheo de vida!



Remata a mañá e volvemos para casa co traballo ben feito, agradecendo que a climatoloxía acompañase e agardando con ansia a derradeira actividade que xa temos á volta da esquina.
Segue lendo...

"Fototrampeo", novo grupo de traballo no G.N.Hábitat. Reunión 13-07-2015



Dende o G.N.Hábitat comprácenos anunciar o establecemento dun novo grupo de traballo, dedicado á posta en práctica da técnica do fototrampeo, e que desenvolverá actividades e proxectos concretos, sempre baixo criterios científicos e cuns obxectivos definidos nos eidos do estudo, conservación e divulgación do patrimonio natural.

A técnica do fototrampeo, utilizada en diversos campos da investigación da fauna silvestre, supón a instalación no campo de equipos fotográficos automatizados e dotados de certas particularidades técnicas. Estes equipos poden ser colocados en lugares remotos, permanecendo alí certo tempo sen necesidade de mantemento algún, e chegan a proporcionar ao investigador información ecolóxica moi valiosa: presenza das especies nun área concreta; identificación de individuos a través do deseño do seu pelaxe; estimación de tamaños poboacionais; entre outras.

Nesta liña, o vindeiro luns 13 de xullo ás 20:30 h, celebrarase unha nova reunión deste grupo de traballo no local da asociación. Á reunión están convidados exclusivamente todos aqueles socios do G.N.Hábitat que queiran achegarse a esta práctica, podendo colaborar nas diversas iniciativas que se poñerán en marcha próximamente.

Prégase confirmación de asistencia a calquera socio que desexe acudir á cita, enviando un mail a gnhabitat@yahoo.es co asunto "Reunión fototrampeo", ou no 981 135 014.
Segue lendo...

3º Obradoiro sobre biodiversidade na Reserva da Biosfera - 12 xullo no Monte Xalo



O vindeiro domingo 12 de xullo de 10 a 13 h terá lugar o derradeiro dos tres obradoiros organizados para dar a coñecer a biodiversidade da Reserva da Biosfera Mariñas Coruñesas e Terras do Mandeo.

Nesta última xornada visitaremos o contorno do espazo natural do Monte Xalo, enmarcado entre os Concellos da Laracha, Cerceda, Culleredo e Carral. Ao longo da mañá, ademáis de poñer en valor as especies de flora e fauna presentes, afondaremos no coñecemento, estudo e protección da Saramaganta (Chioglossa lusitánica), declarada "Especie do ano 2015 na Reserva da Biosfera Mariñas Coruñesas e Terras do Mandeo".

A asistencia, novamente, é de balde e está aberta a todo o público, mais recordade que as prazas son limitadas. Para apuntarse é preciso enviar un mail cos datos de contacto a info@marinasbetanzos.org ou chamar ao 981 669 541.

O punto de encontro será ás 10h no pequeno aparcadoiro situado ao pé da Igrexa de Santa María (Celas de Peiro. Culleredo). Ver mapa de localización. Prégase puntualidade aos participantes.
Segue lendo...

2º Obradoiro sobre biodiversidade na Reserva da Biosfera - 11 xullo na Ría do Burgo



O vindeiro sábado 11 de xullo de 9 a 12 h terá lugar o segundo dos tres obradoiros para dar a coñecer a biodiversidade da Reserva da Biosfera Mariñas Coruñesas e Terras do Mandeo.

Esta xornada estará centrada no eido da ornitoloxía, ciencia dedicada ao estudo das aves. Nela, os asistentes poderán familiarizarse co manexo do material óptico (prismáticos e telescopios) e as guías de campo utilizadas normalmente na observación e estudo das aves. Así mesmo, aprenderán a recoñecer e diferenciar as diversas especies de aves que se poden atopar neste espazo, formado pola desembocadura do río Mero, e que bañas os Concellos de Cambre, Oleiros, Culleredo e A Coruña.

A asistencia é de balde e está aberta a todo o público, mais as prazas son limitadas. Para apuntarse é preciso enviar un mail cos datos de contacto a info@marinasbetanzos.org ou chamar ao 981 669 541. O punto de encontro será ás 9h no paseo da ría, a carón do edificio que alberga o Xardín Botánico e Aula da Natureza Juan Lembeye. Ver mapa de localización.
Segue lendo...

Fragas do Mandeo cumple 5 anos de éxitos

O 6 de xullo Fragas do Mandeo está de aniversario. Naceu hai xa 5 anos co obxectivo de protexer os espazos naturais da bisbarra das Mariñas a través da custodia do territorio.

Nese tempo lográronse adquirir dereitos sobre preto de 200.000 m2 de monte, a metade mediante compra e o resto con acordos a longo prazo. Isto garante a rexeneración e conservación dos hábitats naturais destas parcelas.

Tamén ten actuado nos ríos, na braña e na costa; e todo isto grazas aos doadores e voluntarios que dan vida a este proxecto; ás asociacións que o apoian e difunden o importanto labor desenvolvido, e ás pequenas empresas que colaboraron de distintos xeitos.

Por iso queremos dar as gracias a todos eles, como membros do patronato da Fundación, e felicitalos por ter chegado ata aquí.

E se aínda non formas parte deste marabilloso proxecto, a qué esperas para sumarte á conservación dos nosos espazos naturais? Máis información aquí.
Segue lendo...

Obradoiro sobre biodiversidade na Reserva da Biosfera - 5 xullo en Arteixo


O vindeiro domingo 5 de xullo de 10 a 13 h terá lugar o primeiro de tres obradoiros para dar a coñecer a biodiversidade da Reserva da Biosfera Mariñas Coruñesas e Terras do Mandeo.


Esta xornada estará dedicada a Arteixo, e visitaremos o contorno da Aula de Natureza, o encoro de Rexidoiro e o sistema dunar de Barrañán para coñecer de preto as especies de flora e fauna que alí se atopan, e abordar a problemática das especies invasoras.


A asistencia é de balde mais as prazas son limitadas. Para apuntarse é preciso enviar un mail cos datos de contacto a info@marinasbetanzos.org ou chamar ao 981 669 541. O punto de encontro será a Aula de Natureza "Muíño Vello" (Travesía de Arteixo 309 - A, preto do Centro de Saúde) ás 10 h.
Segue lendo...

Obradoiro de identificación das aves cos afiliados da ONCE



O pasado venres 12 de xuño, membros de Hábitat puxemos en marcha a primeira das actividades previstas nas "Xornadas de achegamento ás aves dirixidas a discapacitados visuais", nas que veñen de colaborar ONCE Coruña e Emalcsa, e que contan co apoio do Concello da Coruña e da Reserva da Biosfera "Mariñas Coruñesas e Terras do Mandeo".

A experiencia, novidosa tanto para os propios afiliados da ONCE como para nós mesmos, non puido ser máis positiva! Desenvolveuse nunha das aulas da sede de ONCE Coruña, e nela os asistentes puideron familiarizarse cos cantos e reclamos das aves máis comúns nos nosos parques e xardíns, grazas á reprodución de diversas audicións comentadas polo monitor da actividade, e experto ornitólogo, Cosme Damián Romay Cousido. Así mesmo, todos eles puideron tamén manipular diferente material relacionado coas aves: niños, plumas, reproducións de diversos exemplares, etc, o que permitiu optimizar a actividade.

En resumo, unha xornada estupenda na que poñerlle nome e apelidos aos autores deses sons que levaban tempo escoitando. Pero isto tan só foi o comezo!



Segue lendo...